हाम्रो उत्कृष्टताको विरासत

नेपालको मध्य भू-भागमा, शान्तिका अग्रदूत, अहिंसाका पुजारी गौतम बुद्धको पावन जन्मभूमिको रूपमा लोकप्रिय लुम्बिनी अञ्चलको तत्कालीन नवलपरासी जिल्ला, हाल बर्दघाट (सुस्ता पूर्व) नवलपुर जिल्ला, देवचुली, शैलशिखरको काखमा अवस्थित, प्राचीनतम एवं धार्मिक आस्था बोकेको, सुसंस्कृत घनाबस्ती तथा दक्षिणमा पवित्र नारायणी गंगाले सुशोभित कावासोती नगरी बीचमा तत्कालीन स्थानीय, सामाजिक शैक्षिक जागरणका लागि प्रयासरत उदारमना र दूरदर्शी व्यक्तित्वहरूको चिन्तन, मनन र सक्रियतामा हाल यस क्षेत्रकै गौरवको प्रतीकका रूपमा शैक्षिक समृद्धि र उन्नयनका लागि सत्यम्, शिवम् र सुन्दरको बीजको रूपमा वि.सं. २०३१ साल भाद्र १ मा यस सामाजिक वातावरण नै कारक बनेको यथार्थ यहाँ उल्लेखनीय छ।

उक्त कच्ची भवनमा वि.सं. २०३७ सालसम्म पठनपाठन हुँदै आएकोमा झरी, हावाहुरी, जाडो-गर्मीले बालबालिकाहरूको पठनपाठन ज्यादै अवरुद्ध हुन गएको महसुस गरी तत्कालीन विद्यालय सञ्चालन समितिका अध्यक्ष श्री खुशीलाल पाण्डे एवं अन्य बुद्धिजीवीहरू — इन्द्रप्रसाद भट्टराई, श्री प्रसाद गुरुङ, कर्ण गुरुङ लगायतका लब्धप्रतिष्ठित, समाजसेवी महानुभावहरूले समाजमा शिक्षाप्रति आवश्यकता एवं आकर्षण महसुस गरी आफ्नो काँधमा विद्यालय भवन निर्माण गर्ने युगीन अभिभारा पूरा गर्न र विद्यालयको स्तरोन्नति गर्न अनिवार्य भएको ठहर गरी दक्षिण मोहडा फर्केको १२ कोठे भवन निर्माण प्रक्रिया थालनी भयो। स्थानीय श्रमदान र सरकारी अनुदान समेतबाट विद्यालय भवन तयार भयो र वि.सं. २०३८ साल चैत्र २७ गते तत्कालीन अर्थ, वाणिज्य तथा आपूर्ति मन्त्री डा. यादवप्रसाद पन्तद्वारा नवनिर्मित भवन उद्घाटन भई उक्त भवनमा पाठनपाठन कार्य आरम्भ भयो।

यस विद्यालयको स्तरोन्नतिको आवश्यकता अनुरूप नेपाल सरकारको शैक्षिक नीति एवं कार्यक्रम अवलम्बन गर्दै उच्च मा.वि. तहको अवधारणाअनुसार वि.सं. २०६३ साल माघ महिनामा विद्यालयको आयोजनामा बृहत् धनधान्याञ्चल ज्ञान महायज्ञ सुसम्पन्न गरी वि.सं. २०६४ सालदेखि उच्च मा.वि. तहको शिक्षा, मानविकी र व्यवस्थापन समूहका कक्षाहरू सञ्चालन हुँदै आएकोमा वि.सं. २०७५ सालदेखि कक्षा ११ र १२ मा विज्ञान समूहका कक्षाहरू सञ्चालन हुँदै आएको छ। विभिन्न पालिका विद्यालयहरूको केन्द्रका रूपमा यो विद्यालय छ।

नेपाल सरकार, शिक्षा मन्त्रालयबाट वि.सं. २०७४।०३।२५ मा नमुना विद्यालय विकास कार्यक्रममा छनोट भई नमुना विद्यालय गुरुयोजना २०७५ मार्फत भौतिक निर्माण तथा शैक्षिक एवं व्यवस्थापकीय कार्यहरू अगाडि बढाइरहेको छ। नवलपुर क्षेत्रकै मध्य भागमा अवस्थित यस विद्यालय मन्त्रालयबाट समेत स्वीकृत प्राप्त गरी हाल भौतिक पूर्वाधार विकासका लागि आवश्यक कार्य सम्पादन गरिरहेको छ। यस विद्यालयलाई गुणस्तरीय, सर्वसुलभ, युगानुकूल, व्यवसायिक एवं प्राविधिक शिक्षा प्रदान गर्न सूक्ष्म स्रोतसाधन सम्पन्न यस क्षेत्रकै नमुना शैक्षिक संस्थाका रूपमा विकसित गर्नका लागि छनोट भई दीर्घकालीन योजना तथा रणनीतिक योजना तर्जुमा गर्नका लागि अहोरात्र प्रयासरत छौं।